聪明人

昨日提到聰明人賺錢，普通人要止蝕的問題，惹起網友不同回應，網友牛腩貓咪講到:「1. 止蝕結果只有一個:賠錢，正常人不想損失。2. 止蝕即代表認錯， 正常人不喜歡認錯。3. 止蝕完，轉頭可能即時反彈，變成雙重損失。正常人無可以接受。不幸地，不正常是市場上的重點----逆向!」

而大笨袋鼠更提出理論解釋，話「『展望理論』(Prospect Theory) 認為人們的決策動機是他們對得與失的認定的價值，當中使用了loss aversion(迴避損失)慨念，損失所帶來的痛苦遠大於獲利所帶來的快樂。損失5舊(500元)的痛苦大於獲利5舊的快樂。」

我諗他們講普通人迴避損失的心理，就是人們炒股時不想止蝕的原因，但炒股若不止蝕又無任何控制風險的方法，恐怕是必輸的遊戲，因為講得叫炒，無論係炒窩、炒期指、炒期權、炒可能大升的二三線股，風險必大，若無控制的方法，你贏9次都無用，只要第10次是一次致命的沒頂之災，就可以把你淹沒，你頭9次愈係贏得勁，第10次愈係心雄，愈死得慘。所以止蝕一啲問題都無，唔想止蝕，唔係遇事時唔止蝕，而係盡量避免要走入止蝕的處境中。

牛腩貓咪講到一個重要的概念: 逆向，但也要正確了解這個概念。炒先炒作要講順勢，不是逆勢，例如美元如今是超強勢，睇走勢的系統會建議「強烈買入」，你如果懶逆向，逆勢沽出，可以輸到好慘，可以輸到你頂唔順打靶，美元才弱番。所以逆向不等如逆勢，逆向是逆群眾之向，不是逆股市之勢。你覺得美元最終會轉番弱，唔好即刻入市大注沽，你應該企在旁邊等，見去有少少回頭走勢，可以放點小注去試盤沽，若再升即止蝕。若試完盤沽出後美元開始向下，慢慢變成順勢時，可以加注沽，呢個就係有一種逆向睇法，但係順勢去做。

我講突然有消息的處境，例如講炒業績，假設有一班聰明人，估到、甚至知道一個公司將會公布怎樣的好業績，他們在業績公布前一兩個星期前買入，結果真係宣布好業績，他們作為短炒者，好可能在消息曝光第二日早上開市，股份大力抽高時，佢地就沽貨出街，最多普通人想買的時候，就是聰明人大手出貨的最好時候，這隻股份的所有短線表現，在消息公布的第二日早上10時的幾分鐘內已完全體現。

你可能即刻會駁我，有些好股，公布完業績抽升後回一回，過一兩日又會重拾升勢。這完全不是奇怪的事，但已換了一批買家。短炒的聰明人退了場，短炒的普通人接了貨，隻股回番一兩日，短炒的普通人頂唔順打了靶或者怕悶離了場，中長線投資者等靜番先至才入場，這是另一場遊戲，長線投資者如果真係有料到，佢睇緊公司明年、後年的盈利增長，當短炒的群眾退場時，也是一個逆向機會，俾無內幕的長線投資者進場，我經常話長線投資者唔好高追，就係呢個原因。